Hetsiky ny mpitondra fivavahana

Hampiseho hery ka hanangana
tetezamita vaovao amin’izay

Efa betsaka ny nandroso vahaolana teto fa tsy misy mpihaino. Izay nitranga efa telo taona lasa izay ihany no miseho.
Taorian’ny famakiana bantsilana ny fandehan’ny toe-draharaham-pirenena misy amin’izao fotoana nataon’ny Hetsiky ny mpitondra fivavahana tamin’ny fiandohan’ity volana ity dia  raikitra fa hiroso amin’ny lalindalina kokoa amin’izay ry zareo. Nambara tamin’ny fomba ofisialy nandritra ny valan-dresaka ho an’ny mpanao gazety, tetsy amin’ny Hotel La Rotonde Besarety, afakomaly, fa   hanangana tetezamita vaovao ireto Pasitera ireto miaraka amin’ireo vondron-kery avy amin’ny sehatra samihafa efa mahatratra hatramin’ny 60. « Hiaraha-mahita fa tsy vitsy no efa nilavo lefona ka tsy afa-manoatra fa vaotery manaiky tsy fidiny na dia izay hita fa tsy rariny aza. Hita miharihary fa tsy mahavaha olana ny tondrozotra fa vao mainka  nanamafy ny fifandirana efa nisy teto, nahalatsaka antsika amin’izao kizo lalina izao. Izany no iantsoan’ny Hmf ny hijoro sy hiaina amin’ny fahamarinana ary valin’izany no hijoroan’ny vondrona –hetsika fahamarinana tetezamita vaovao », hoy ny fanambarana. « Handeha haingana ny fananganana an’io fa tsy holazainay aminareo ny paikady. Hisy rafitra « organe » kosa hametraka azy » hoy ny fanazavana. Dia nilaza ny efa manana ny drafitra rehetra  entina amin’io ry Pasitera. « Efa vita ny rafitry ny tetezamita vaovao izay tsy hihoatra ny 14 volana. Tsy mbola holazainay aminareo anefa fa na ny fomba hanatanterahana azy aza efa nisy dingana vita. Raha mbola ilaina ny fifandresen-dahatra  dia azo atao izany. Afaka mampiseho hery koa anefa ny vondron-kery.Omeo fahafahana miteny fotsiny izahay  dia ho hitantsika eo fa ho feno ny Kianjaben’i Mahamasina », hoy ny Pasitera Philbert  Ramamonjisoa.
   Miala ho azy
 Tsy hitarika olona hidina an-keriny an-dalambe hanongana an’i Andry Rajoelina ny HMF. « Tsy afaka milaza izay hitranga isika. Miala ho azy eo fotsiny ireo mpitondra ireo rehefa toherin’ny vahoaka. Izahay tsy handeha hiady aman’olona amin’izany fa raha izao toe-draharaha izao izay efa mitarika ny vahoaka ho amin’ny fihantsiana dia tsy mandeha amin’izany ny lalana handehanan’io.  Mieritreritra mantsy ireo mpitondra fa azy ny vahoaka sy ny hery ka dia ho hita eo. Tsy hilaza kosa  izahay hoe mitsipaka anay ny vahoaka fa mahazo toky izahay noho ny zava-misy », hoy ny Pasitera Roger Randriamisata.
Mahakasika ny sehatra iraisam-pirenena dia nilaza ireto Pasitera ireto fa  « tsy afaka ny tsy  hiara-hiasa amin’ny any ivelany isika saingy  isika no mila mametraka fa tsy ry zareo. Efa nisy fifampiresahanas tamin’izy ireo ary tsy ho ela dia ho  tonga eny am-pelatanan’ny  solontena avy any ivelany ny fananganana ity tetezamita vaovao ity mba hahafahany manampy ».  hoy ny fanazavana. Dia ho hita eo izany izay ho tohiny, satria hatreto aloha dia mitovy tadin-dokanga avokoa ny tsy mpankasitraka an’ity fitondrana ity. Dia asa izay ho « action » ?
Ny Tahiry R.