Ny ba gasy sy hiran’ny omaly

Anio tolakandro etsy amin’ny Cemdelac 

 Etsy amin’ny Cemdelac (Galerie 6 taloha) Analakely indray no hotanterahina ny sehatra « ba gasy » andiany faha-6. Anio zoma manomboka amin’ny 3 ora tolakandro ka hatramin’ny 7ora hariva no hifamotoana amin’ny fiangaliana ba gasy ny tomponandraikitra. « Ny ba gasy sy ny hiran’ny omaly » no omen’izy ireo sehatra anio tolakandro. Araka izany, dia ny sanganasan’ireo artista malaza tany amin’ny taona 60 tany ho any,  ary mbola tsy lany hamamiana hatramin’izao no hampiainan’izy ireo an-tsehatra amin’izany. Isan’ireny ny sanganasan-dry Ranaivo Ranarivelo, Barijaona, Naly Rakotofiringa, RR Majunga, Ramaroson Wilson, Andrianary CN, sy ny maro hafa. Vahiny manokana hitafatafa amin’ireo rehetra mamaly ny antso ao an-toerana i Franck, mpihiran’i RR Majunga fahiny. Tiana ny manamarika fa R’imbosa no tompomarika amin’ity fanandratana sy famelomana ny « sehatra ba gasy » ity.
Fy