Fort-Duchesne

Trano telo kila tsy nisy noraisina

Nisehoana haintrano teny Fort Duchesne omaly tokony ho tamin'ny 3 ora maraina, ka trano telo mifanila no rava tanteraka tsy nisy noraisina. Maty tao avokoa ny entana rehetra ka anisan'izany ny vata fampangatsiahana roa ary kiraro iray gony. Araka ny fanazavana azo, fivarotana ny roa tamin'ireo, dia gargoty sy fivarotana enta-madinika izany, ary trano fanamboarana kiraro kosa ny iray. Tsy fantatra mazava aloha izay anton'ny loza sy niatombohan'ny afo fa ny afo efa nijoalajoala no hitan'ny olona. Trano hazo ny roa tamin'ireo trano ireo, sady nandrivotra rahateo ny andro ka vetivety dia nahazo vahana ny afo ary nifindra tamin'ilay trano biriky teo akaikiny koa. Tsy misy mipetraka ao ny tompon'ireo trano ireo fa kosa mipetraka tsy lavitra eny amin'ny manodidina eny ihany. Na izany aza anefa dia fantatra fa misy lehilahy mpiambina anankitelo ireo trano ireo, araka ny fanazavan'ny teny an-toerana ihany. Nantsoina haingana ny sampana mpamonjy voina izay tonga vetivety. Afaka adiny iray nanaovana ny asany vao maty ny afo. Tsy nisy naratra na namoy aina tamin'ity haintrano ity.
T.H