Ing. Roland Ratsiraka

Maika amin’ny resaka fifidianana!

Samy mandrirotra izay metimety aminy ireo mpanao politika amin’izao fametrahana ny fitondrana tetezamita izao. Ny an’Ing. Rolland Ratsiraka dia ny mahakasika ny fifidianana no mahakaika azy. Fandodonana mihitsy aza nataony amin’ireo mpitantana ny Tetezamita satria dia nambarany nandritra ny valan-dresaka ho an’ny mpanao gazety teny amin’ny Hotel Colbert omaly fa: “tokony ho fantatra amin’ny herinandro ambony ny pitsopitsony rehetra mahakasika ny fifidianana raha toa ka tsy maintsy vitaina alohan’ny 26 jona ihany ny fifidianana Filoham-pirenena”. Ny Governemanta hikarakara izany aza anefa tsy mbola fantatra na ho teraka indray anio na tsia. Mbola zavatra hafa koa aza no nambarany momba ity tsy fitsanganan’ny governemanta ity ka nilazany fa “raha toa ka tsy mitsangana anio ny governemanta dia tokony handray andraikitra Ing. Andry Rajoelina sy ny Praiminisitra Mangalaza Eugène ary hanangana governemanta hafa”.
Ny Tahiry R.