« Dzaomalaza et le saphir bleu »

Nalefa voalohany omaly tetsy Analakely 

 Masy lalaovin’i Onja Tinondia, Evah kosa ho an’Irina Raveloson, Revola velomin’i Ainasoa Synthia ary Dzaomalaza  kosa ho an’i Michel Gormany. Ireo no mpilalao fofotra amin’ilay horonantsary novokarin’ny UNICEF miaraka amin’ny Digital Development Communication ao amin’i «Dzaomalaza et le saphir bleu»  izay nalefa voalohany omaly tetsy amin’ny Foibe Ara-tsaina Albert Camus Analakely. Tohin’ilay horonantsary voalohany hoe «Dzaomalaza et le boutre brûlé » izy ity, saingy nolalaovina tany amin’ny faritra atsimon’ny nosy.  Horonantsary mampahafantatra ny zava-misy any sy ny olana atrehin’ny tanora kanefa mampieritreritra  azy amin’ny fomba hahombiazana eo amin’ny fiainana. «Fitaovana iray hanentanana ny tanora hahalala  ny zony  sy  hitaky ny fampiharana izany  ity horonantsary ity kanefa mitaona azy ireo ihany koa  handray andraikitra eo amin’ny fiainana manoloana ny zavatra sarotra  mahazo ny tanora ! »  hoy indrindra Atoa Bruno Maes, masoivohon’ny UNICEF eto amintsika nandritra ny valandresaka tetsy Andraharo niarahana tamin’ireo artista nilalao ny tantara.

FIFANAKALOZAN-KEVITRA

 Tany amin’ny tapany avaratry ny nosy no nolalaovina ny horonantsary voalohany «Dzaomalaza et le boutre brûlé» : mitantara ny  fiainan’i Nirina sy Vola mpianatra ao amin’ny Lycée Nosy Be naniry hahazo finday avy amin’i Dzaomalaza izay mpanao raharaha maizimaizina  izy io. Tsy ampoizina ny «vidin’ilay finday». Vehivavy telo – Masy, Evah, Revola – kosa no mandrirotra an’i Dzaomalaza ao amin’ny horonantsary «Dzaomalaza et le saphir bleu» mba ho tafita eo amin’ny fiainana amin’ny alalan’ny safira. Araka ny fanazavana nomena omaly teny Andraharo, aorianan’ny fandefasana ny horonantsary dia hisy ny dinika fifanakalozan-kevitra eo amin’ny tanora. Kasaina halefa any amin’ireo faritra 22 amin’ny alalan’ny Alliance Française mantsy ny tantaran’i Dzaomalaza andiany faharoa ity.
H.R.