Kitra – Mondial U-20 vehivavy

Tsy ho atsy La Réunion i Bôlô

Hanainga ny zoma  izao ho atsy La Réunion ny Barean'i Madagasikara vehivavy latsaky ny 20 taona, hiatrika ny lalao miverina amin-dry zareo Renioney, tafiditra amin'ny dingana savaranonando ny «Mondial 2010», taranja baolina kitra. Efa fantatra  ireo mpilalao 18 mirahavavy handeha, ka tsy ao anatin'izany Ravaosoloarimalala Nadia(Bôlô), izay mitazona ny toeran'ny «poste 6». Tsy mandeha koa i Zafikely Sophie Virginie, izay nambaran'Ingahy Andriatinasasoa Herihaja mpanazatra  fa noho ny faharatran'izy ireo no antony .  I Betsara Sidonie Jessica sy Rakotoniaina Nadia kosa no hisolo azy ireto, hanampy ireo 16 mirahavavy niatrika ny lalao mandroso, izay tsiahivina fa niondrehantsika tamin'ny isa 1 noho 3. Ny asabotsy alina no hanaovana ny baolina any Saint André ka rahampitso alina no hanao fanazarantena etsy Mahamasina ny Barea.
Rabenaivo