Volley-Tompondakan’i M/kara

Sempotra tanteraka ny Ift sy ny Vbcd

Nihevitra ry Rose de Lima fa tsy sarotra aminy ny hahazo fandresena. Nihoitra anefa ny tovovavin’Atsinanana ka tsy namelany raha tsy sahala ny seta roa farany.
Tao anatin’ny fanatanterahana ny “tie break” vao fantatra ny ekipa vehivavy nandresy ny mpifanandrina taminy, omaly, tetsy amin’ny kianja mitafon’Ankorondrano. Raha 15 no ho 9 no nandavoan’ny Vbcd Analamanga ny Jirama-n’i Toamasina, dia tamin’ny 18 no ho 16 kosa no nandresen’ny Ift Analamanga ny Stef’Auto. Niady ny baolina satria nifanenjehena hatrany ny seta, ary tsy maintsy notanterahina ny tsotsori-mamba nisarahana. Nandritra ny fihaonan’ny Ift  sy ny Stef’Auto, dia azon’ny solontenan’Analamanga avokoa ny seta roa voalohany (25/23 – 25/20). Nihevitra ry Rose de Lima fa tsy sarotra aminy ny hahazo fandresena. Nihoitra anefa ny tovovavin’Atsinanana ka dia tsy namelany raha tsy sahala ny seta roa farany (25/20 – 25/20). Nifamaliana kosa ny fandrombahana ny seta teo amin’ny Vbcd sy ny Jirama. Nisantatra ny fandresena voalohany ny mpilalaon’Analamanga (25/19), ary dia novalian’ny mpifanandrina taminy izany (25/22), dia toraka izany hatrany ny fizotran’ny adin’izy ireo (Vbcd : 25/18 ; Jirama : 25/22), izay tsy nifarana raha tsy tamin’ny “tie break”. Tsy sarotra tamin’ny Cosrom 14 Antsirabe ny nanamontsana ny Tsarafaritra Ihosy tamin’ny seta 3 no 0, ary dia toraka izany ihany koa no nampiondrehan’ny Jirama-n’i Toliary an’ny Asvbm Mahajanga. Toy ny omaly tsy miova ny voka-dalao tamin’ny lehilahy, teny amin’ny kianja mitafon’i Mahamasina, fa ny ekipan’ny Pygarques Fenerive Est ihany no mba nahazo seta iray teo anatrehan’ny As Voara Antsirabe.  Ift Fianarantsoa (3) # Assm (0) ; Cosrom 14 Antsirabe (3) # As Avotra Toamasina (0) ; Tiko Sc (3) # Asuma Mahajanga (0).
Ny fizotry ny lalao anio : Kianja Ankorondrano / 8 ora : As St Pierre # As Voara (L) ; Pygarques # Asuma (L) ; Cosroma 5 # Akats ; Tsarafaritra # Cosfa – Kianja Mahamasina / 8 ora : Asvbm Mahajanga # Vbcd (V) ; Stef’Auto # Cosrom 14 (V) ; Jirama Toliary # As Avotra Toamasina (L) ; Cosrom 14 # Ift Fianarantsoa (L).
a.r