Vidim-bary

Tafakatra Ar 1.400 ny kilaon’ny makalioka

Raha somary nipetrapetraka tamin’iny volana oktobra iny ny vidim-bary dia tafakatra Ar 1.400 ny kilao nanomboka tamin’ny voalohan’ny herinandro iny ny vidin’ny vary makalioka fotsy lava. Araka ny nambaran’ireo mpaninjarany eny amin’ny Pavillons Analakely, Anosibe, Ankadidratombo dia efa hatrany amin’ny mpamongady no miakatra ny vidim-bary. Isika rahateo tafiditra anatin’ny vanim-potoana tsy fisian’ny vary na “période de soudure”, hoy ireo ekonomista. Raha ny vinavinan’ireo mpamboly dia mbola ampy ihany ny vary fa ny vidiny no mety tsy ho voafehy afaka kelikely satria vanim-potoan’ny rivodoza koa amin’ny volana desambra iny ka miankina amin’ny orana lava reny sy ny mety ho fahasimban’ny voly ny voka-bary. Hatramin’ny volana marsa na aprily iny moa ny faharetan’ny rivo-doza eto amintsika izay efa nambaran’ny mpahafantatra ny toetr’andro fa sady ho maromaro izy no handalo eto no mety hahery vaika tokoa.
R.S