Tsaralalàna

Mpandeha taxi voatafika sy voatifitra

Nivoaka ny fiara ilay saofera ary nijanona ela be tany.
Mpandeha taxi iray no notafihin’ny jiolahy teny Tsaralalàna afakomaly alina. Voatifitra teo amin’ny ranjony havia izy ary lasan-dry zalahy ny vola 740.000 Ariary sy ny finday teny aminy. Avy eny 67 Ha ralehilahy ary ho eny Ambatoroka tamin’io ka nanakana taxi. Nony tonga teny Tsaralalàna manoloana ny biraon’ny polisy dia nilaza ilay saofera fa tsy afaka mandeha any Ambatoroka. Nalainy ny 5 arivo Ariary dia nafindrany taxi hafa ilay mpandeha. Vao nandeha kelikely tamin’ity taxi faharoa ity indray dia najanon’ilay saofera teo akaikin’ny “Conforama” ny fiara dia lasa nivoaka ilay saofera. Ela be tany io ka nivoaka nijoro teo ivelan’ilay fiara ilay mpandeha. Teo no nisy efa-dahy nipoitra. Ny iray nitondra basy asry nitifitra azy avy hatrany. Ny iray hafa namely tamin’ny sabatra saingy voatohany. Ny fahatelo nively kibay ny tongony ary ilay iray farany nijoro teny lavidavitra. Nosavaina izy ka lasa ny vola sy ny finday. Saika handeha ilay taxi fa nisy polisy nahita ka nasain’io nitondra ilay lehilahy nankany amin’ny biraon’ny polisy. Notadiavina ireo jiolahy ka tratra teo akaikin’ny “Roso” ny iray. Efa notsaboina ilay naratra. Misy mpitondra taxi ahiana ho mifandray tendro amin’ireo jiolahy.
T.H