Famahana krizy

Tokony tsy homba ny atsy na ny aroa ny Foloalindahy

Nahavelom-panantenana ny Foloalindahy ny fanambarana nataon’ny tomponandraikitra ambony eo anivon’ny Foloalindahy, tetsy amin’ny toby Ratsimandrava izay raha fintinina dia mampiseho fa iray ny tafika ary izay hampiray ny Foloalindahy hatrany no tanjona. Tokony hotazonina, hoy ny mpitandro filaminana, izay toerana misy ny Foloalindahy izay ka tsy hiandanian’izy ireo amin’ny atsy na ny aroa. Ny zava-misy mantsy dia misy mieritreritra ny tafika ho fitaovana azy manokana. Nefa tsy tokony ho izany fa natao hiantoka ny filaminana sy ny fandriam-pahalemana, ary indrindra hiantoka ny fifaninanana pôlitika izy.
Araka ny loharanom-baovao eny anivon’ny tafika ihany dia heverina fa nakan’ny Foloalindahy lesona ny zava-nisy ka tsy hisy intsony izany tafika hanongam-panjakana izany.
Marihina fa fanirian’ny ankamaroan’ny foloalindahy io.
Tamin’ny sabotsy lasa teo anefa dia tsiahivina fa naneho ny heviny mikasika ny raharaham-pirenena sy ny fisian’ny fivorian’ny ankolafy pôlitika 4 any Maputo ny Lehiben’ny Etamazaoro. Nomarihiny fa tsy ekena raha hiteraka korontana ny fanapahan-kevitra raisin’ny ankolafy 3 any ivelany, indrindra raha ho tonga amina fananganana governemanta vaovao izany ka hisiana governemanta roa eto Madagasikara.
V.R.