Fenoarivobe

Tovolahy roa maty an-drano

Fatin-dehilahy roa be izao no hitan’ny olona natsingevan’ny rano tao Tsinjoarivo- Fenoarivobe ny Sabotsy teo. Nikoropaka avy hatrany ny olona tamin’ny fahitàna izany ka nampandrenesina haingana ny mpitandro ny filaminana teo an-tanàna. Nampakarina an-tanety ny razana ary samy nitangorona nijery ny olona hamantatra azy ireo. Tamin’izany no nahalalana fa mponina eo amin’ny manodidina ihany izy roa lahy, izay 16 taona sy 18 taona eo. Tsy fantatra kosa anefa izay tena nahavoa azy ireto na hoe nilomano dia rendrika na antony hafa mihitsy. Efa eo am-pelatanan’ny mpitandro ny filaminana moa ny raharaha amin’izao fotoana izao. Raha ny hita dia saika miakatra avokoa ny rano amin’ny faritra maro manerana ny nosy satria nisesy ny fiavian’ny orana. Tokony hitandrina hatrany ny tsirairay noho izany satria ny mahay rano ihany no maty an-drano hoy ny fitenenana.
R.C