Jiu Jitsu - Tompondakan’i Afrika

Nahazo medaly volamena 2 ny Malagasy

Medaly efatra (2 volamena, 2 volafotsy) no azon’i Madagasikara nandritra ny andiany voalohany tamin’ny fiadiana ny Tompondakan’i Afrika ho an’ny taranja Jiu Jitsu natao tany Barnard Stadium Kempton Park any Afrika Atsimo, ny 5 desambra lasa teo. Ankoatr’izay dia mbola nahazo laharana voalohany koa isika ho an’ireo firenena nandray anjara ka mbola niampy medaly volamena iray izany, izay nomena ny mpanazatra Rabarilala Faly. Marihina fa ny klioban’ny Gordinho Jiu Jitsu Team no nisolo tena antsika tamin’ity andiany ity, izay nandefa mpikatroka dimy mirahalahy. Fantatra ihany koa fa voahosotra ho tompondakan’ny Oseana Indianina i Bernadette Ravaoarisoa (sokajy vehivavy) ho an’ny taranja « Canne de Combat », natao tatsy Maorisy ny faran’ny herinandro teo. Manoloana izany vokatra azon’izy ireto izany dia notoloran’ingahy Virapin Ramamonjisoa, Minisitry ny Fanatanjahantena, mari-pankasitrahana avy izy ireto omaly teny Ambohijatovo, ary nanome toky izy fa hanampy hatrany ireto atleta ireto amin’ny manaraka.
Rabenaivo