Rugby – Tompondakan’ny Oseana Indiana

Vonona ny 3FB

Efa vonona tanteraka hifandona amin’ny Rc St Pierre avy atsy La Réunion ny 3FB, mandritra ilay lalao tafiditra amin’ny fiadiana ny Tompondakan’ny Oseana Indiana 2009, izay hotanterahina anio tolakandro eny amin’ny kianjaben’i Mahamasina, taranja Rugby. Tsahivina fa fihaonana fanintelony eo amin’ny ekipa roa tonta izy ity ka mbola manala vela ny solontenantsika satria efa resin’ireto Renioney ireto in-2 (2004 - 2006). Azo antoka izany fa hahita lalao miady ireo mpijery ho tonga eny satria dia mbola ialohavan’ny fihaonana eo amin’ny IRC sy ny Cosfa ihany koa, izay lalao tafiditra amin’ny dingana manasa-dalan’ny fiadiana ny TOP 16. Eo amin’ny fanokafam-bavony indray dia mbola hifanandrina amin’ity ekipan’ny Rc St Pierre (D2) ihany koa ny Savonnerie, izay inoana fa lalao hiady koa. Raha ny nambaran-dry zareo avy ao amin’ny Federasiona Malagasy ho an’ity taranja Rugby ity ihany, dia hikatona amin’ny 3 ora ny vavahady mba hitandroana ny filaminana. Mila tonga aloha arak’izany ireo maniry ho eny Mahamasina anio.
Rabenaivo