Efa tafody saingy…

Nesorina tsy ho Praminisitra Ing. Mangalaza

Didim-panjakana manala azy tsy ho Praiminitra intsony no novantanin’Ing. Mangalaza Eugène vantany vao afaka niverina an-tanindrazana omaly. Nofoanan’Ing. Andry Rajoelina io omaly io ihany koa ny didim-panjakana n°2009-1260 tamin’ny 10 oktobra 2009 nanendrena azy ho Praiminisitra. Raha izay no izy dia tokony hiverina amin’ny fitondrana FAT izany ny fitondrana eto amintsika. Tsy tokony hilaza ho Filohan’ny Tetezamita intsony koa izany Ing. Andry Rajoelina fa miverina ho Filohan’ny fitondrana Avon’ny Tetezamita indray. Nanamafy an’izay ny Pr. Zafy Albert teny amin’ny Carlton ka nilaza fa: “efa nanala tena tsy ho Filohan’ny Tetezamita intsony i Andry Rajoelina satria nivadika tamin’ny sonia nataony tamin’ny fifanarahana tany Addis-Abeba. Filohan’ny FAT izy izao”. Ing. Emmanuel Rakotovahiny koa dia nanamarika fa: “efa niala tamin’ny fifanarahana izy ka tsy Filoha intsony”. 
Ny Tahiry R.